挩窗去弄險:大士爺厚火氣 | 被動收入的投資秘訣 - 2024年9月
![](https://www.books.com.tw/img/001/080/23/0010802311.jpg)
挩窗去弄險:大士爺厚火氣
大士爺,厚火氣;神明界,鬼王亂。
小英雄,好智慧;弄險古,永流傳。
舊曆七月二三,鬧熱滾滾的民雄街仔,當咧舉辦一年一改上重要的下街祭典。仝一个時間,煞無人知影,打貓神明界發生百年來上大的危機……
因為人類無照天理,能源開發無站節,予鬼王核能化,心狂火著,野心爆炸,欲來消滅神明界,做天地唯一的霸主。人類歹心痟貪,爭權奪利,欺神騙佛,予觀音心肝捙跋反,失望貼底,無想欲插世事矣。加上台灣人健保濫糝用,害醫療人員過勞,予大道公一粒頭兩粒大,無法度出診去看觀音的病……
神明界有難,派屘虎爺去人世討救兵,無疑誤去揣一个囡仔疕,號做「挩窗」。好佳哉挩窗真巧骨,跤手猛掠,台語輾轉,和屘虎爺成做一對貼峇冒險伴,一關過一關。in敢會赴佇普渡化火進前,收伏鬼王?
鬼王掠狂來作亂,光明向望佇人間。一逝飛天鑽地,捙拚戰鬥,出入歷史傳說,解救神明界危機的神怪奇幻弄險古,就欲來起行囉!
【華語翻譯】
農曆七月二十三號,熱鬧滾滾的民雄街道,正在舉辦一年一次最重要的下街祭典,同一時間,卻沒人知道,打貓神明界發生了百年來最大的危機……
因為人類不遵從天理,能源開發毫無節制,讓鬼王核能化,心火狂燒,野心爆炸,要來消滅神明界,當天地之間唯一的霸主。人類壞心貪婪,爭權奪利,欺騙神佛,讓觀音心思折騰,失望透頂,不想再管世事了。加上台灣人濫用健保,害醫療人員過勞,搞得大道公一個頭兩個大,沒辦法出診去看觀音的病……
神明界有難,派小虎爺去人世討救兵,沒想到去找一個小屁孩,叫做「挩窗」。幸好挩窗耳聰目明,動作敏捷,台語流利,和小虎爺成為一對麻吉冒險伴,一關過一關,他們來得及在普渡火化之前,收伏鬼王嗎?
鬼王抓狂來作亂,光明希望在人間。一趟飛天遁地、對決戰鬥,出入歷史傳說,解救神明界危機的奇幻冒險故事,就要出發囉!
本書特色
1.全篇故事以台語文書寫,使用教育部推薦漢字佮台羅拼音,台語學習、對照字典真利便。
2.每集最後,附簡單的華文故事翻譯,對台語較生疏的初學者,會當先入來奇幻的小說世界,才閣開始台語閱讀的新體驗。
3.全冊30集,每一集攏有專業的台語朗讀QRcode連結,手機仔掃落去線頂聽,那聽那讀,台文學習、聽古趣味攏妥當。
4.藝術家洪福田創作版畫插圖,配合弄險主題曲佮過場音樂,台語文學跨界創作,精彩呈現。
※本冊得著國藝會出版補助、火金姑台語文學出版基金贊助出版
專業推薦
何敬堯 奇幻作家
角斯角斯 神怪插畫家
黃震南 藏書家「活水來冊房」
陳豐惠 李江却台語文教基金會執行長
游珮芸 國立台東大學兒童文學研究所所長
作者簡介
鄭順聰 Tēnn Sūn-tshong
嘉義縣民雄鄉人,中山大學中文系,台師大國文研究所畢業。曾任《重現台灣史》主編,《聯合文學》執行主編。
作品有《時刻表》、《家工廠》、《海邊有夠熱情》、《晃遊地》、《基隆的氣味》、《黑白片中要大笑》、《台語好日子》。佇國立教育廣播電台主持全台語節目「拍破台語顛倒勇」。
面冊:www.facebook.com/gustave.cheng.9
校訂者簡介
吳嫣珉 Gôo Ian-bîn/台語漢字校訂
國立台中教育大學台灣語文學系、國立台灣師範大學台灣語文學系碩士班畢業,興趣是台灣文化。
繪者簡介
洪福田 Âng Hok-tiân
台南人,一直用畫圖來食頭路,現此時蹛佇有樹仔的台南巷仔內。這幾年對宮廟的民俗美術痴迷,這陣拍拚咧學習傳統工夫「木刻水印」版畫;嘛受著日本時代的作家西川滿影響,興咧做藏冊票、手工限定冊的創作。
踏話頭 挩窗去弄險
序 開窗冒險去
第一集 蠟條
第二集 加薦
第三集 尾溜
第四集 打貓
第五集 茶鈷
第六集 珍珠
第七集 雲尪
第八集 掛號
第九集 紅線
第十集 放送
第十一集 柳枝
第十二集 出磺
第十三集 批信
第十四集 骷髏
第十五集 魯蛇
第十六集 炸彈
第十七集 地陷
第十八集 Phe-Tshia
第十九集 水燈
第二十集 鴨仔
第二十一集 鬼厝
第二十二集 溪底
第二十三集 金光
第二十四集 欶管
第二十五集 捙拚
第二十六集 昏迷
第二十七集 飛天
第二十八集 地獄
第二十九集 臨界
第三十集 日誌
踏話頭
挩窗去弄險
2012年的熱天,彼時阮查某囝猶細漢,暗時電火關起來欲睏進前,若無講故事予過癮,是絕對袂放我煞的。
按呢逐工講逐工講,我烏白編亂亂說強欲無膏矣,囡仔硬愛我講落去,而且閣出難題:阮欲聽獅仔的故事啦!
嘛毋知欲講啥,我就講有一隻獅仔,廟門祀的彼款石獅仔,伊尻川癢,癢幾若十冬矣。
話頭遮爾仔趣味,查某囝精神就來矣,要求我共故事講透流。進前全無本,時到時擔當,紲落來我就講這隻石獅仔迒過神人的隔界,趁廟口無人,央一个囝仔兄來共爬癢,解決伊的舊症頭。(註1)
囡仔兄就是這本冊的主角:挩窗(Thuah-thang),佇彼个暗暝顯聖,行來我佮查某囝的地頭。毋管是食飯、睏進前、或者坐車無聊時,見若有要求,我就來講古,講挩窗佇人世和神明界飛天鑽地,走跳台灣南北二路,行踏世界各國,這个囡仔兄𤆬領阮規家伙仔挵入去奇幻的宇宙,可比拍電動解破一關閣一關,精彩刺激,鬧熱趣味。故事有長有短,有零星有規部的,抾拾整理好勢,用台文落筆,這就是「挩窗去弄險」系列。
Thuah-thang,四常的意思是人目睭仁對袂正,雞仔目,袂輸共人譬相;佇我的故事內底,「挩窗--ê」是一个勇敢掛智慧的小英雄;毋閣,若按日常的口語寫做台文,踮文學藝術的境界,「挩窗」的意義是:共心肝頭的窗仔門挩開,來去看這个美麗新世界。
2014年11月初,毋知是啥因端,雄雄想欲去騎虎王爺遐拜拜。踏踮廟埕,囡仔時來這搭圍仔補作文、食筒仔米糕的記持就瀳倚來矣。1984年騎虎王爺廟過翻起新廟,舊料保存落來,有影頂真,上寶貴的是柴雕的鰲魚,幼路閣活氣。較拍損的是,檢采為著保護驚去傷著,煞關佇咧鐵窗仔內。
我隨咒誓,定著來寫故事,共鰲魚救出來。(註2)
按怎救呢?自細漢蹛民雄街仔附近,規年迵天上重要的鬧熱,就是下街(Ē-ke)。彼是民雄囡仔最大的向望,我就共踅下街鬥鬧熱的歡喜和在地的歷史敆做伙,連紲三工佇飯桌仔全台語講古予查某囝聽,紲來用華語拍粗稿,先囥咧。
等我台文寫甲較扭掠矣,網路的發表平台嘛有新進展,就主動共SOS reader 提案,感謝團隊的牽成,2016年12月起鼓網路連載,一禮拜刊一集,攏總三十集,有台語文、相片影片、超連結解說佮錄音唸讀,這就是網路版的《大士爺厚火氣》。
這馬,交踮你手頭的,是紙印的《大士爺厚火氣》,多謝前衛出版社和主編鄭清鴻綿爛編輯,國藝會和火金姑台語文學基金補助,洪福田的版畫藝術,排版束結,朗讀錄音紲拍好聽,予這部出版計畫毋但完成,閣予台文冊一坎起去,實在是豐沛、媠氣、奅啦!
順聰我骨力拍拚創作《大士爺厚火氣》,是欲來建立「現代台文」敘述SOP,予台語飽滇的力頭盡展;而且用輕鬆活跳的小說,𤆬讀者來認捌台灣的神明鬼怪、歷史地理、傳說故事;上要緊的是,思考現代文明的困境佮未來。
故事全我編的,純屬虛構,若有雷同,彼攏是䢢拄䢢。內容對神明不敬的所在,請多多包涵,順聰我做的一切,攏是為著推捒台語,共咱的文化底蒂和宗教精神發揚光大。
當咧寫故事之時,九十幾歲的阿媽忽然間倒勼,轉去做一个囡仔,講話離離落落,頭殼沓沓仔失去……我看著真毋甘,就去握伊的手……經歷人生滄桑坎坷,阿媽的手面親像囡仔遐爾仔金滑幼秀……講著下街,阿媽煞記甲真清楚,講往過𤆬我去看大士爺伯化火的記持,宛然拄去過彼款……。
細漢時上愛轉去阿媽的田庄遐耍,佇古厝的眠床頂,聽阿媽講ももたろうさん(桃太郎)物語,我講古的才調是伊傳予我的。阿媽的台語講甲遐爾仔老(láu),我是一个冊讀甲真懸的智識分子,閣是攑筆的作家,怎會當輸予共我惜命命的阿媽呢!
「挩窗去弄險」系列故事,毋但講予我的查某囝聽,是欲予全台灣的囡仔聽,千千萬萬的囡仔聽,大人嘛愛斟酌聽─恁會當佇故事內底使囡仔性,佮「挩窗」仝款,四界行踏,認捌這个心適到有賰的美麗世界,啥物攏毋驚。
準備好矣未?和我同齊大聲喝出來:
我是勇敢掛智慧的小英雄,這場人生的大弄險,來起行!
註1:完整故事刊印佇《牧笛獎精品童話11:蒼蠅螞蟻讀心術》,鄭順聰〈屁股癢的石獅子〉彼篇,國語日報出版。
註2:我寫的是彼時的情形。後來,廟方共鐵窗仔換做新櫥仔,做甲真好勢,鰲魚這馬蹛佇咧真四序的所在呢。
第九集 紅線(Âng-suànn) 看大道公無閒甲,挩窗和哈囉感覺真歹勢,毋敢攪吵,佇廟角那啉青草茶那參詳:「敢講咱落空逝,大道公叫袂行啦。」挩窗真煩惱。 「大道公做代誌綿死綿爛,無到十全袂煞。伊的俗名號做吳本,為著欲救濟病、老、幼、弱,四界去揣草藥仔,無張持跋落山崁死去。上天帶念伊的德行,助伊得道升天,來做醫藥之神。」哈囉講。 規个保生大帝廟空lo-lo、恬tsih-tsih,干焦聽著挩窗共茶吞落嚨喉空的聲,廟暗眠摸的內底點一葩火,傳來大道公攑筆寫病歷的窸窸窣窣。 「大道公毋但是醫藥之神,嘛是阮虎仔兄弟的恩情人,」哈囉𤆬挩窗來到壁堵的石雕頭前,那欣賞那開破:「彼時,大道公為著採藥,行入去內山斗底,暴憑一隻虎傱出來,生做白額金睛,面橫霸霸。原來,彼隻為非糝做的食人虎踢著鐵枋,嚨喉空去予人的骨頭哽著,艱苦甲!大道公就佮虎品予好,以後袂當閣食人,食人虎頕頭允伊,大道公才燒符仔水灌入喉,骨頭化去,阮彼个虎仔兄弟才共命救轉來。自彼工開始,升做大道公的坐騎,烏虎將軍就是按呢來的。」 「啊!這我知!阮阿無庄的鐵牛伯仔有講過,這叫做『醫虎喉』,敢若閣有龍的款呢⋯⋯」挩窗煞想袂起來。 「點龍眼啦!」哈囉𤆬挩窗行到龍爿,仝款有一塊石雕:「彼時有某乜人來揣大道公看病,講目睭無蓋爽快,大道公隨共拆破,講你毋是人啦,神龍隨現出原形!大道公就攑毛筆共點目睭,神龍的病就好矣,真正是看會清、看會明。」 「喔,鐵牛伯仔講伊目睭濛霧,會澀會驚光,醫生講伊白內障。仝款的症頭,像龍彼種神獸,活千千萬萬年,規工佇天頂飛,日頭赤焱焱目睭仁熟去,嘛著白內障矣。」挩窗按呢想。 「你閣真𠢕講咧,去做醫生好矣啦!」哈囉共挩窗刮。 「鐵牛伯仔常在講,莫佇關公面頭前弄大刀,我才毋敢佇大道公面頭前講醫術咧。遮的故事攏真好聽,敢閣有別个?」挩窗無愛聽教示,較興故事。 「有囉!有囉!」哈囉看挩窗遐興,精神就來矣:「你敢知大道公的醫術有偌𠢕?名聲是透京城!早當時,宋仁宗的太后,就是皇帝的老母破病,御醫治袂好,就共全天下有才調的大夫叫來,仝款束手無策。終其尾,由咱大道公來解破,敆藥仔寬寬仔來調養,太后的病就好矣!」